تجارب منقوله عن العنايه بالبشرة ؟؟؟

طبعا بشكر كل المتسابقات وبتمنى لهم التوفيق

واتمنى الاستفاده للجميع والتصويت بامانه

ارجو عدم ذكر صوتي لايه

علشان متاثريش على راي اي عضوة اخرى
ولكم جزيل الشكر

المتسابقات هما:

erenolla

لميس العرب

koko 7abibi ana

التجارب مش بنفس ترتيب اسامي العضوات

التجربه الاولى:

انا عندى 19 سنة وبشرتى دهنية

ولما باكل شوكولاتة وشى بيبقى حالته حالة والحبوب بتبقى فظيعة بجد

والحبوب تقريبا بدأت تظهر فى وشى وانا فى ثانوى

وجربت من وقتها حاجات كتير اوى

يعنى صابونة كبريت غسول مراهم ولا حياااة لمن تنادى

بس وانا فى تانية كلية كنت مستمرة على صابونة الكبريت (للى كانت بتنشف وشى وعشان كده كنت بستخدم بعدها كريم مرطب طبعااا) وغسول يومى كلين اند كلير)

وعدت السنة وتقريبا من غير نتيجة

لحد ما وصلت للحل الاكيد فى اجازة نص السنة فى سنة تالتة كلية

والحل هو تاتاتاتاتاااااااااااا كانت خلطة لقتها على النت عشان الحبوب واثارها كمان

والخلطة عبارة عن معلقتين خميرة فورية ومعلقتين زبادى ونقلبهم كويس

ونحطهم على وشنا تلت ساعة بس انا بصراحة ساعات كنت بسيبها اكتر

وبعد كده بقى بجيب مية دافية واغسل بيها وشى

وفضلت ماشية على الخلطة دى بتاع شهر شهر ونص

كنت بعملها كل يوم وبعد كده بقيت اعملها مرة مرتين فى الاسبوع

بس هى النتيجة ظهرت معايا من اول 3 اسابيع تقريبا وش صافى

مفيهوش ولا حباية نقى وجميل وكان هو ده المطلوب اثباته

وكل اصحابى قرايبى والاهل والمعارف والخ الخ كانوا لاحظوا وسألونى عملت ايه وكده
مع العلم ان انا مبقتش اكل شكولاته غير فى المناسبات دلوقتى

هى والمخللات وبصراحة انا تقريبا انا دلوقتى موقفة الماسك ده يعنى مبعملهوش غيرلا لما الاقى حبوب ظهرتلى
وبسسسسسسسسسسسسسس
هى دى تجربتى وبارب كل الناس تستفيد منها

تجارب منقوله عن العنايه بالبشرة ؟؟؟ 94

التجربة التانيه :

بصوا يا بنات
1.انا من زمان اوي بشرتي صافية الحمدلله مافيهاش اي حاجة.(كنت اياميها بستعمل كريم منيرفا للتفتيح قبل ما يظهر مساوئة طبعا-وفوقه واقي شمسي نيتروجينا)

بعد فتره بدات البشرة تزيت اوي من المنيرفا ده الكلام ده سنه 1999..فجبت كريم لوريال النهاري..مش هقولكم اد ايه كان ناعم وجميل..وفوقه واقي الشمس..

جيت بقى بعد ثانوية عامة لقيت ان وشي بيطلع فيه حبوب حمرا(مش حب شباب خالص) يعني تحسي انها rush احمر
المهم رحت لدكاتره كتير اوي ادوني كريمات كتيره(كريمات تركيبتها kojic acid-erethromycin) طبعا مش فاكره الاسماء لاني كنت بره مصر مش هنا والاسماء مختلفة تماما--رغيت كتير انا
المهم تخلصت من موضوع الحبوب واكتشفت ان الحبوب بقعت..مش عايزة اقولكم عن تعب نفسيتي من الحبوب.جتلي منين دي؟طول عمر بشرتي مرايا(ماش اء الله)

المهم بدات العمل ايه؟
1.اعمل حمام بخار لمده 5 دقايق لوشي مرة اسبوعيا...وبعد ما المسام تفتح كل بخلط نقطتين كحول بمعلقة لبن سايل وامسح وشي بالقطنة واسبه ينشف لمده 3 دقايق)..الكحول هيطهر البشرة واللبن هيهديها
2.كنت بشيل اللبن ده بايه؟(بغلي شويه ميه=وبحطها على كبشه كاموميل(وممكن تجيبي كاموميل اكياس) وبسيبه ينقع 5 دقايق وبعدين ببل القطنه بالمنقوع ده وبمسح اللبن(ليه.؟) لان الكاموكميل بيهدي البشره..
3.بعد ما ميه الكاموميل تنشف كنت بحط كريم مرطب...(مرة على مرة لقيت الحبوب بتختفي)..لاني كنت بعمي كده 3 مرات اسبوعيا...وكنت بخفف الدوا تدريجيا...

طبعا انا بتكلم عن شوية حبوب بسيطة مش حبوب كبيرة ومزمنه ..

بالنسبه بقى للبقع عملت ايه؟
1.كنت طبعا بعمل بشرايح البطاطس وبحط بعدها على طول كريم مبيض يبقى كويس ويديم النتيجة
2.كنت بخلط شوية لمون بلبن زبادي(بس اللمون يبقى اكتر وبدهن وشي بيه) وبسيبه ينشف
واحيانا كنت بخلط الخميرة بالخل ونقطة لبن واسبه على وشي لحد ما ينشف واغسله بميه دافية وبعدها اعدي على وشي قطعة تلج محطوطة في قطنه..
3.كنت بعمل ماسك الترمس المطحون باللبن مرة اسبوعيا بيبيض ويشد البشرة..(وبرضه بستخدمه لبياض المنطقة الحساسة)...

4.ماسك الطين للوش كل 10 ايام مرة(كل ده عشان يمتص دهون الحبوب ويفتح المكان)

عشان ما ابقاش كدابة برضه كنت بعمل جلسة تقشير كمل شهر مرة

وكنت بلتزم اوي على كريم الوقاية من الشمس لانه بيمنع الحبوب يسود مكانها...

الموضوع كتعلق برضه بشوية تغيير في اسلوب الحياة
1.تخفيف كمية المقالي والدهون(لما كنت بتخن كانت الحبوب بتظهر اوي)
2.الاستمرار على واقي الشمس
3.الاستمرار على متعدد فيتامين(كنت باخد centrum)
4.البيريود تبقى مزبوطة (لان لخبطتها بتلخبط الجسم كله)
5.النوم بدري..وتناول كميات كبيرة من الخيار والورقيات(الخس-الجرجير)
6.ابعدي عن اي توتر قدر الامكان لان الحبوب ممكن تبقى (اساسها تعب نفسي)

تجارب منقوله عن العنايه بالبشرة ؟؟؟ 94

التجربة الثالثه:

بسم الله الرحمن الرحيم

انا عندى 17 سنه وبشرتى عاديه وفى فتره كده طلعتلى حبوب وفيها روس بيضا كده

وانت بتوجعنى اوى ومبوظه وشى راح بابا (دكتور صيدلى )

قالى على وصفه حلوة اوى

شوفى يا ستى

معلقة دقيق زيرو

معلقة حبة البركه مطحونه

معلقتين وشويه عسل

معلقه كريم بنثينول ( كان ب 1ونص من الصيدليه )

وكله على بعضه فى طبق صغير وبعدين تقلبيه لحد ما يبقى زى

الكريمه كده وتحطيه على وشك لمدة ربع ساعه وبعدين تغيليه

وتنشفى كويس

والله العظيم مرتين ورا بعض على طول لقيت وشى اتشد وكل البقع

والالوان والحبوب راحت و سا بت وشى نااااااعم وحريرى

وفيه لمعه تجنن

ومن بعدها بحط الخلطه دى لكل حاجه

شكرا لكى وجزاكى الله خير